Tuesday, December 15, 2009

အမေ့လျော့ခံ ကြေးရုပ်ထု

ဒီဇင်ဘာကိုရောက်လာပါဗျလ် ။ အီးစက်စိုစွပ်ရေ နှင်းတိ မြူတိ ဆိုင်းဗျလ် လှချင်တိုင်းလှနိန်ရေ ကိုယ်မြို့ကိုယ်အရပ်ဒေသကို လွမ်းလို့ လာပါရေ။ ညှာတံပေါ်မှာ နှင်းရေချေတိ ခိုတွဲစိုစွပ်နိန်ရေ သဇင်ပန်းချေတစ်ခက်လောက် ဘုရားတင်ခွင့် ပန်ဆင်ခွင့်ရဖို့ အခွင့်အရေးမရှိရေလူတစ်ယောက် အတွက်တောင် အေဒီဇင်ဘာရေ ရခိုင်တစ်ယောက်အတွက် မမေ့ပျောက်နိုင်ရေ အရာချေတိက ဆက်စပ်လို့ ကျန်ရှိနိန်ပါသိမ့်ရေ။ ဒီဇင်ဘာ ၁၅ ရခိုင်ပြည်နယ်နေ့ကိုရောက်လို့ လာပါရေ။ ကမ္ဘာနှင့် အ၀န်းမှာရှိနိန်ရေ ရခိုင်များက ဖော်မပြနိုင်ရေ ခံစားချက်ကိုယ်စီဖြင့် ကိုယ်ပြည်ကိုယ့်ရွာကို သတိတရ ဖြစ်တတ်ကတ်ပါရေ။

ယင်းတိုင်ဆိုင်မှုတိထဲသတိတရ ဖြစ်မိစွာကတော့ ကြေးရုပ်ထုတစ်ခုကိုလည်း ရခိုင်ပြည်နှင့် ယဉ်ပြီးကေ ရခိုင်တိုင်းက သတိရမိတတ်ပါရေ ။ နှင်းရေနှင်းစက်အောက်မှာ အွီးစက်နိန်ရေ ကြေးရုပ်ထုကြီး တစ်ခုရေ စစ်တွေမြို့ မြို့လည်တည့်တည့်မှာ တည်ရှိနိန်ပါလီဖို့ ။ ယင်းရုပ်ထုကြီးစွာ ရခိုင်လူမျိုး ရခိုင်သမိုင်းသစ်မှာတော့ ပါရဂူတစ်ဆူ အာဇာနည်သူရဲတစ်ယောက် ဖြစ်ခဖူးပါရေ။ ယင်းသူရဲကောင်း၏ ကိုယ်ကျိူးစွန့် အသက်ပေးစွမ်းဆောင်ခဲ့မှုကို ဂုဏ်ပြုထား ခြင်းဖြစ်ပါရေ ။ ထိုကြေးရုပ်ကြီးသည် ကမ္ဘာကို အံတုခရေ လူသားတစ်ဦး၏ အရိပ်ဟောင်း၊ လူမျိုးတစ်ခု၏ လက်ဦး ဆရာတစ်ဆူ၊ နိုင်ငံတစ်နိုင်ငံ၏ မမေ့အပ်ရေ အရိုသေခံ လူတစ်ဦးဖြစ်ခရေပိုင်၊ ထူးဆန်းသည့် အတွေး အခေါ် ရင့်သန်သည့် သမာဓီ ခိုင်မာသည့် ယုံကြည်ချက်များ ဖြင့် လူ့အခွင့်အရေးဆိုသော စကား လုံးကို လူသားအားလုံးအတွက် ရှေ့ဦးစွာ အရေးဆိုပေးခဲ့သူ ဖြစ်ခဖူးပါရေ။ ထောင် ဆိုသော စကားလုံးနှင့် ဆင်းရဲငတ်မွတ်ခြင်းသည် ပင်လျှင်နောက်တွန့် လောက်စေသော အတားဆီး မဖြစ် ခရေ ထိုသူ၏ သတ္တိ အတွက် သူမွေးရပ်မြေဇာတီက ဂုဏ်ပြုထားရေ ကြေးရုပ်ကြီးဖြစ်ပါရေ။ ယင်းလူသားကလည်း လွန်ခရေ နှစ်ပေါင်းတစ်ရာကျော်က ဒေဒီဇင်ဘာဆောင်အာရုံဦးတစ်ရက်မှာ မွီးဖွားခပါရေ။

ယင်းကြေးရုပ်ကြီးပိုင်ရှင်ရေ ဆောင်မှာမွီးခကေလည်း သူ၏အသည်းနှလုံးတိက ကမ္ဘာသူ ကမ္ဘာသားများနှင့် ရခိုင်ပြည်သူပြည်သားများအတွက် နီရဲတောက်ပြောင်သော နီမင်းအသွင်ကို ဆောင်လို့ နိန်ခပါရေ။ လွတ်လပ်ရေးဆိုသော သစ်ပင်ကို ကိုယ်ကျိုးမဖက်ဘဲ နှလုံးသွေးဖြင့် နောင်လာနောင်သားများအတွက် စိုက်ပျိုးပီးခပါရေ။ သစ်ရိပ်ခိုရေ နောင်လာနောင်သားတိက အသီးကိုလည်း စား အကိုင်းကိုလည်းချိုး အခေါက်ကိုလည်း ခွာချတတ်ကတ်တေပိုင်း သစ်ပင်စိုက်ပျိုးပီးခရေ လူ ကျေးဇူးကိုတော့ခါ မေ့လျော့လားခကတ်ပါရေ။ မျိုးဆက်သစ် ရခိုင်ပြည်သူ ပြည်သားအသည်းနှလုံးက အေကြေးရုပ်အပေါ်မှားထားရေ ခံစားချက်က ဒီဇင်ဘာဆောင်ထက်တောင် ပိုပြီးကေ အီးစက်လို့ နိန်ပါသိမ့်ရေ။ ရခိုင်ပြည်သူတို့၏ အသိတရားကို နှင်းတိ မြူတိ ဖုံးအုပ်လို လားလီကတ်တေလို့ ရာ ထင်မိပါယင့်။

ကမ္ဘာအ၀န်း အ၀ီးရောက် ရခိုင်များက ဆရာတော် မွီးနိန်ကို အမှတ်တရ ကျင့်ပဖို့ စိုင်းပြင်လိုနိန်ကတ်တေ အချိန်မှာ စစ်တွေမြို့က ရခိုင်သူ ရခိုင်သားများ ရေ ဆရာတော်ဦးဥတ္တမ မွီးနိန်ကို အမှတ်တရ ရှိကတ်ပါဖို့လားချင့် တွေးမိဖြစ်ပါရေ ။ လူသိန်းပေါင်းများစွာ နိန်ထိုင်နိန်ရေ စစ်တွေမြို့က လူဇာနှစ်ယောက်လောက် ကြေးရုပ်ကြီးရှိရေ ပန်းခြံထဲကို ဂါရ၀ပြုဖို့ အောက်မေ့သတိရလို့ ကျေးဇူးကို အမှတ်ရမိလို့ လာလီကတ်ပါဖို့လည်းချင့်။လမ်းမကြီးပေါ် ဖြတ်သွား ဖြတ်လာမြောက်မြားစွာထဲက ကြေးရုပ်ရှေ့ကို ရောက်ရေ အခိုက် သတိတရ လှည့်ကြည့်လားရေ လူတိများ ရှိကတ်ပါဖို့လားချင့် ။ ဆုတောင်းအမျှအတန်းဝေပီးဖိုလူ ထိုကြေးရုပ်ကြီးပိုင်ရှင်အတွက် ဖုယောင်းတိုင်တစ်ချောင်းလောက် ထွန်းညှီပူဇော်ပီးပြီးကေ အောက်မီဆုတောင်ပွဲလုပ်ပီးဖို့ လူ တစ်ယောက်လောက်တော့ စစ်တွေမြို့မှာရှိဇီချင်ပါရေ။

ရွှေရောင်တ၀င်းဝင်းနှင့် မြို့ကျက်သရေဆောင် အေကြီးရုပ်ထုကြီးကို ရုပ်ထုဟောင်းတစ်ခုလို့ရာ မြင်လီကတ်ဖို့ ၊ တစ်ချိန်က ကမ္ဘာနှင့် ချီပြီးကေ လေးစားဂါရ၀ ပြုခံခရရေ လူတစ်ယောက်ရေ အေနိန်ငါ့ရို့နှင့် မဆိုင်လိုက်ဗျလ် လို့ရာထင်လီကတ်ဖို့၊ နိုင်ငံတစ်နိုင်ငံ၏ နိုင်ငံရေးခြယ်လှယ်မှု အောက်မှာ အမှန်တရားတိ ဖုံးကွယ်ခံနိန်ရရေဆိုတိုင်း ကိုယ်တိုင်းပြည် ကိုယ်လူမျိုးထဲက ပူဇော်ထိုက်သူကို ပူဇော်ဖို မေ့နိန်ကတ်တေ ဂုဏ်ပြုထိုက်သူကို ဂုဏ်ပြုဖို မေ့နိန်ကတ်တေ ဆိုကေ ရခိုင်လူမျိုးတစ်ခုလုံးလုပ်ရပ်ကတော့ ကောင်းကောင်းရှက်စရာကောင်းလီဖို့ပါဗျလ်။

ရက္ခတအနွယ်ဟု မိမိကိုယ်ကို ဂုဏ်ဖော်တင်စားနိန်ကတ်တေ အေရခိုင်ပြည်သူတိက ကိုယ့်လူမျိုးတစ်ယောက် လုပ်ရပ်ကို လည်း မလေးစား ၊ ကိုယ်လူမျိုးတစ်ခုလုံး၏ ဂုဏ်ကိုလည်းမဖော်ဆောင် ၊ ကိုယ်၏သိဏ္ခာတရားတိလည်း ဂရုမစိုက် ၊ အလေးနက်ထားသင့်ရေ လုပ်ရပ်တိကိုလည်း သတိမမှုဘဲ ရာနေထိုင်နိန်ကတ်တေ ဆိုကေ ယင်းပိုင်အရပ်မှာ ရုပ်ထုကြီးတစ်ခု တည်ရှိနေခြင်းက ဇာတစ်ခုလည်း အဓီပ္ပါယ်ရှိလီဖို့လည်း မဟုတ်ပါဗျလ်။ ယင်းရုပ်ထုကြီးပိုင်ရှင် ၏ မွီးနေ့ချေ တစ်ရက် ကျရောက်လာစွာကိုတောင် မသိလိုက်ကတ်တေ လူတိအတွက် တစ်ချိန်က ရခိုင်ပြည်လွတ်လပ်ရေအတွက် မိမိကိုယ်ကို အသက်ပေး စတေးပြီးကေ ဆောင်ရွက်ပီးခရေ ဆရာတော်ဦးဥတ္တမကို တခြားလူတိက မေ့မေ့ပျောက်ပျောက် လားခကတ်ကေလည်း ရခိုင်ပြည်သူအပေါင်း မမေ့အပ်သင့်ပါဆိုရေအကြောင့် ဆရာတော်မွီးနေ့အကြို သတိပေးဆောင်ပါးတစ်ပုဒ်ဖြင့် နီုးဆော်တိုက်တွန်းလိုက်ရေ။ နိုးထကတ်ဖို့အချိန်ရောက်ဗျလ် ရခိုင်သားရို့ဝေ….

စောစစ်(ဒေ၀ီ)
16.12.2009

No comments:

Post a Comment