မြောက်ဦးအလွမ်း

မိုင်းမှုံသာစွ ထိုဌာနမှာ
ထုံးဖြူဘုရား လက်ညှိုးညွန်းရာ
တည်ဟိလီရေ အမျိုးသီလ
ဂုဏ်တင်ပြဖို့ အခိုင်အမာ
စံတင်ထိုက်တေ ဌာနီလှမှာ
ကွေ့လီကွေ့ပတ် နဂါးပတ်လား ထင်ယောင်မှားစီ
မြို့ဝင်မြို့ပတ် သွယ်သွယ်ရဈာယ် တောင်ဆိုင်ကြားမှာ
မြို့ရောင်ဖျောက်လို ဟိလီယင့် ..။

စကားနှင့်ကျော် ငါးမာန်ပုထိုး
အဖသျှစ်သောင်း သားကိုးသောင်းဟု
ထုက္ကန်သိမ်နှင့် လောင်ပွန်းပြောက်ကို
ဖူးဇောင်လားတုန်း အနုစိပ်လက်ရာ မွန်ခလီရေ
သုခုမကို အံ့ဖူးပါယင့် ငါရို့ပြည်ကို
စန္ဒမုနိ မြတ်ဆင်းထုမှာ ဆုတောင်းဖူးရေ
(မြီကိုငါချစ် တီဖြစ်ကေလည်း တီရာဖြစ်ရပါလို၏) လို့ .. ။

အဆူဆူသော ထိုထိုဘုရား
ကိန်းဝပ်သည့်မြို့
မယိုင်ဓလေ့ အစဉ်ဆက်ကာ
ထွန်းကားလီယင့် ရာဇ၀င်နှင့်
ဤမြို့လည်းရွှေ ရွှေလည်းရွှေဟု
တင်နှိုင်းခရေ ထိုဓညမြို့
ဘုရားအရိပ် ရင်ငွေ့လှုံကေ
အီးချမ်းလီယင့် အီးချမ်းယင့်လေ ..၊

နန်းရာဟောင်းနှင့် မြို့ရိုးကြားမှာ-
ဓည၀တီကျောင်းဝင်းထဲမှာ-
အံတော်သိမ်ဘုရားရှိမှာ-
သက်သီတည်ကေ ဆုတောင်းမိရေ

(ငါတိုင်းပြည်က ကျောက်ခဲကျိုးတောင် ငါချစ်ပါယင့်၊
အကြိမ်တသောင်း ငါသီကေလဲ့
အကြိမ်တသိန်း အေလူမျိုးရာ ပြန်ဖြစ်ချင်ယင့်) လို့ ..။

ဆောင်းဝင်တခေါက် လည်ဇောင်ရောက်တု
မြုံနှင့်နှင်းရို့ အာရုံဦးမှာ
ဘုရားနှင့်ပန်း အဆင်းဟပ်လို့ အလှဆင့်ရေ
မကြွီတ၀ှက် ကြွီတ၀ှက်နှင့်
ရိုးလှသန္တာ ရနံ့ရင်မှာ ကျန်ပါသိမ့်ရေ ..။

ရခိုင်သူဆံထက် သဇင်လှိုင်ကေ
ထိုမြို့ အရပ် မြို့မြောက်ဦးမှာ
ရွှေတူငွေတူ ဇရက်ဖြူနှင့်
ဆောင်းပန်းဆောင်းရက်
နှင်းကြာတောမှာ အပျော်ဘ၀င် လီဟပ်လားဗျာယ်
အနော်မာကန်ဘေး
အ၀ါရောင်ပန်းတပွင့် ပန်းရိုင်းဆိုလည်း ပန်းဖူးခရေ
အလည်ရောက်ဖူး နန်းရာမြို့လေ စိမ်းရိပ်ခြုံရေ
မြို့မြောက်ဦးကို အောက်မိရေ ..၊


စောစစ် (ဒေ၀ီ)